काठमाडौं । कुमारी बैंक लिमिटेड र वात्सल्य नेचुरल आईभीएफ प्रालिबीच सम्झौता भएको छ ।
कुमारी बैंकका ग्राहकलाई वात्सलय नेचुरल आईभीएफको देशभरि रहेका शाखाबाट विशेष छुट प्रदान गर्ने विषयमा दुवै पक्षबीच सम्झौता भएको हो ।
सम्झौता अनुसार कुमारी बैंकका ग्राहकलाई वात्सल्य आईभीएफ प्याकेजमा १० हजार रुपैयाँ छुट प्रदान गरिने छ ।
साथै उपचारका क्रममा आवश्यक पर्ने सबै प्याथोलोजी परीक्षणहरूमा १० प्रतिशत र औषधि खरिदमा ५ प्रतिशतसम्म छुट प्रदान गरिनेछ ।
काठमाडौंको नक्सालमा रहेको वात्सल्य नेचुरलले बाँझोपन परीक्षण, बाँझोपन उपचार, प्रजनन् क्षमता संरक्षण, दाता उपचार तथा गर्भ परीक्षण लगायतका सेवाहरु प्रदान गर्दै आइरहेको छ ।
१३ माघ, इलाम। इलाम चौंथो साहित्य महोत्सव आउँदो चैत्र १ र २ गते हुने भएको छ ।
साहित्यको क्षेत्रबाट इलामको पर्यटन प्रवर्द्धन गर्दै इलामको साहित्यलाई देश विदेशमा चिनाउने उद्देश्यका साथ साहित्य महोत्सवको आयोजना गर्न लागिएको पत्रकार सम्मेलन गरी आयोजकले जानकारी दिएको छ। साथै कार्यक्रममा आयोजकले लोगो समेत सार्वजानिक गरेको छ ।
पर्यटनका लागि साहित्य भन्ने नाराका साथ हुन लागेको महोत्सवमा नेपाल र भारत, भियतनामलगायत विभिन्न युरोपियन देशका चर्चित साहित्यकारहरूको उपस्थिति रहने आयोजक इलाम साहित्य कला संगीत प्रतिष्ठानका अध्यक्ष प्रकाश थामसुहाङले बताए ।
साहित्यिक क्षेत्रमा अग्रपङ्तिमा रहेको इलाम पछिल्ला दिनमा खस्कँदै गएको भन्दै त्यसको पुनःजागरणका लागि चौंथो संस्करणको महोत्सव हुन लागेको हो।
यसअघि २०७६ सालमा प्रथम इलाम साहित्य महोत्सव सञ्चालन भएको थियो । इलाम साहित्य समाज र इलाम नगर साहित्य कला प्रतिष्ठानको आयोजना तथा नेपाल प्रज्ञा प्रतिष्ठानको सहकार्यमा हुन लागेको इलाम साहित्य समाजका सचिब रोशन राईले जानकारी दिए ।
यस महोत्सवमा नेपाली सिने जगतका चर्चित कलाकारहरू, चर्चित राजनितिज्ञहरुको पनि उपस्थिति रहनेछ । महोत्सवमा बिभीन्न विषयमा छलफल र बहस हुनेछ ।
यस्तै सिक्कीमका पुर्ब मुख्यमन्त्री पवन चाम्लिङ संगको राजनितिक बहस समेत रहनेछ ।
खर्चअनुमान करिब साडे २२ लाख रुपैयाँ खर्च लाग्ने यस साहित्य महोत्सवको माध्यमबाट इलामको पर्यटन क्षेत्रमा प्रत्यक्ष फाइदा पुग्ने विश्वास आयोजकले लिएको अध्यक्ष थाम्सुहाङले बताए ।
महोत्सवमा साहित्यसँगै पर्यटन, राजनीति र इलामको चिनारीबारे बहस हुनेछ ।
काठमाडौं । संचारकर्मी समेत रहेकी गीतकार गीता अधिकारीको आलेख संग्रह ‘कलमका डोबहरू’ लोकार्पण गरिएको छ । आयोजित समारोहमा नेपाली फिल्म क्षेत्रका वरिष्ठ अभिनेत्रीद्वय चैत्यदेवी सिंह र भुवन चन्दले पुस्तक सार्वजनिक गरे ।
यसअघि ‘मैले पढेका ५१ पुस्तक’ पाठकमाझ ल्याएकी अधिकारीले जन्मदिनको अवसरमा पुस्तक ल्याएकी हुन् । लेखक अधिकारीले विविध समयमा प्रकाशित आलेखलाई संग्रहित गरेर पुस्तकाकार दिएको बताइन् ।
मिलाप पब्लिकेशनका अध्यक्ष कृष्ण भुसालले लेखक अधिकारीले आफ्ना आलेखलाई दस्तावेजीकरण गरेको जानकारी दिए । पुस्तकमा सो समयका विभिन्न घटना र विषयलाई समेटिएको उनले जनाए ।
सञ्चारकर्मी रिना श्रेष्ठले सहजीकरण गरेको कार्यक्रममा मिलापको पुस अंकमा कभर स्टोरीमा रहेकी साहित्यकार राधा भण्डारीलाई कभर सम्मान अर्पण गरिएको थियो । अथितिलाई मायाको चिनो पनि प्रदान गरिएको थियो ।
लेखक अधिकारी कला मनोरञ्जन विधाको पत्रकारितामा सक्रिय छिन् । उनका ‘यतै घमाइलो उतै घमाइलो’, ‘तीजैमा व्रत बसी’, ‘बजाउँदै चुरा’, ‘श्वास फेरी’, ‘छम्मछम्म’ जस्ता एकदर्जन जति गीत श्रोता/दर्शकमाझ आएका छन् । मिलाप पब्लिकेशन प्रालिले पाठकमाझ ल्याएको ४७७ पेजको यस कृतिको मूल्य ९९९ रुपैयाँ राखिएको छ ।
७ माघ, काठमाडौं । नइ प्रकाशनले राष्ट्रिय जीवनका ख्यातिप्राप्त १० जना साधकलाई २०८० सालको ‘नइ पुरस्कार’ समर्पण गर्ने निर्णय गरेको छ ।
नइ प्रकाशनका कुलपति इन्दिरा प्रसाईको अध्यक्षतामा सोमबार बसेको नइ प्रकाशनको बैठकले उक्त निर्णय गरेको नइ प्रकाशनका सदस्यसचिव नरेन्द्रराज प्रसाईले जानकारी दिए ।
उनका अुनसार नइ प्रकाशनबाट अध्यात्म दर्शन र सनातन धर्मसंस्कृतिको जागरण, संरक्षण र सम्वर्धनका लागि प्राज्ञिक रूपमा सात दशकदेखि समर्पित प्रा.चेतोनाथ शर्मा आचार्यलाई ‘नइ चन्द्रधन पुरस्कार’ समर्पण गरिने भएको छ ।
यस्तै नेपाल राष्ट्रको गौरवमय धर्म र संस्कृतिको अनुसन्धान तथा सांस्कृतिक जागरणका लागि सात दशक अघिदेखि अविच्छिन्न रूपमा समर्पित संस्कृति शिरोमणि श्री हरिराम जोशीलाई ‘नइ भूपालदुर्गा पुरस्कार’ समर्पण गरिने निर्णय भएको छ ।
यस्तै नेपाली भाषा साहित्यको सेवामा समर्पित रही विविध सिर्जना तथा प्राज्ञिक चिन्तनमा पुर्याएको विशिष्ट योगदानका निम्ति प्रा.गोपीकृष्ण शर्मालाई ‘नइ देरुनीख सुकीर्ति पुरस्कार’ समर्पण गर्ने निर्णय भएको उनले बताए ।
नेपालको भौगोलिक अखण्डता, सार्वभौमिकता, राष्ट्रिय स्वाधीनता र स्वाभिमानको सम्वर्धनका लागि निष्ठावान् प्रा.डा.मोहन लोहनीलाई ‘नइ कीर्तिनिधि पुरस्कार’ समर्पण गर्ने निर्णय भएको उनको भनाइ छ ।
स्वास्थ्य विज्ञानमा मन, वचन र कर्मले समाहित भई अन्तर्राष्ट्रिय क्षेत्रमा समेत नेपालको गौरव बढाएबापत न्युरो सर्जन डा.वसन्त पन्तलाई ‘नइ भावी पुरस्कार’ समर्पण गरिने भएको छ ।
त्यसै गरी सञ्चारका माध्यमबाट देशदेशान्तरमा नेपाली भाषाको गरिमा वृद्धिका साथै रेडियो नेपालको जनप्रियता बढाउनसमेत महत्त्वपूर्ण योगदान दिएबापत श्री कमल प्रधान तथा श्री ध्रुव थापालाई ‘नइ भाजप पुरस्कार’ संयुक्त रूपमा समर्पण गरिने भएको छ ।
नेपाली भाषामा बालसाहित्यका विविध विधाहरूको सिर्जनाका साथै बाल चेतनाको संवर्धनका निम्ति श्रीमती रञ्जुश्री पराजुलीलाई ‘नइ रेखा पुरस्कार’ समर्पण गर्ने निर्णय भएको छ ।
काठमाडौं उपत्यकाबाहिर रहेर नेपाली भाषासाहित्यको सिर्जना र सम्वर्धनमा विशिष्ट योगदान पुर्याएबापत पर्वतका श्री शान्तिनारायण श्रेष्ठलाई ‘नइ धनरूप पुरस्कार’ समर्पण गरिने भएको छ ।
त्यसैगरी राजधानीबाहिर रही नेपाली भाषासाहित्यको सिर्जनामा निरन्तर समर्पित विराटनगरका श्रीमती राधिका गुरागाईंलाई ‘नइ बुलु शर्मा पुरस्कार’ समर्पण गरिने भएको छ ।
यी सबै पुरस्कारको राशि जनही एकएक लाख रुपैयाँ रहेको छ ।
६ माघ, काठमाडौं । समाजशास्त्री डोरबहादुर विष्टको चर्चित अंग्रेजी किताब ‘रिपोर्ट फ्रम ल्हासा’ को नेपाली अनुवाद हुने भएको छ ।
विष्टको ९८ औँ जन्मदिवसको अवसर पारेर किताबलाई नेपाली भाषामा प्रकाशन गर्न बुक हिल पब्लिकेशन र डोर बहादुर विष्ट फाउण्डेसनबीच सम्झौता भएको हो ।
अंग्रेजी भाषामा लिखित पुस्तकलाई पत्रकार विराट अनुपमले नेपाली भाषामा रुपान्तरण गर्नेछन् । किताबको नाम ‘ल्हासाको खबर’ राखिएको छ ।
प्रकाशक संस्था बुक हिलका प्रतिनिधि भुपेन्द्र खड्काले किताब चैतसम्ममा बजारमा ल्याइसक्ने जानकारी दिए । अनुवादक अनुपमले आफू डोरबहादुर विष्टबाट प्रभावित भएको हुँदा उनीसँग अनुवादकको रूपमा जोडिन पाउँदा खुसी भएको बताए ।
डोरबहादुर विष्टका सुपुत्र एवंम पूर्वमन्त्री केशरबहादुर विष्टले बुवाकाबारे विदेशका विश्वविद्यालयहरूमा डिपार्टमेन्टकै नाम रहन गएको भन्दै समाजशास्त्र एवंम् मानवशास्त्र पढ्ने विद्यार्थीले अनिवार्य पढ्नुपर्ने बताएका छन् ।
उनले आम नेपाली भाषाका पाठकसमक्ष पुग्न यस नेपाली भाषाको किताबले महत्त्वपूर्ण भूमिका खेल्ने विश्वास व्यक्त गरे ।
गण्डकी विश्वविद्यालयका कुलपति प्रा.डा. गणेसमान गुरुङले आफूले विष्टसँग लामो समय काम गरेको अनुभव सुनाउँदै उनी पठनमा उन्मुख गराउने व्यक्ति रहेको स्मरण गरे ।
डोर बहादुर विष्टको जीवनसँग सम्बन्धित डकुमेन्ट्री ‘म अलप हुन चाहन्छु’ समेत देखाइएको थियो ।
५ माघ, काठमाडौं । आर्थिक पत्रकार गजेन्द्र बुढाथोकीको ‘जंगबहादुर इन इङ्ल्याण्ड’ नामक पुस्तक सार्वजनिक भएको छ ।
राजधानीमा आयोजित एक कार्यक्रममा बुढाथोकीका पिता भक्तबहादुर, इतिहासका प्राध्यापक त्रिरत्न मानन्धर, पत्रकार कुन्दमणि दिक्षित, लेखक यादव देवकोटाले पुस्तक सार्वजनिक गरे ।
५ माघ, काठमाडौं । सिस्नुपानी नेपालले संयुक्त अरब इमिरेट्स (यूएई) मा दुई थोपा हाँसो कार्यक्रम सम्पन्न गरेको छ । नयाँ वर्ष २०२५ को अवसरमा युएईमा बसोबास गर्ने श्रमशील नेपाली नागरिकलाई मनोरञ्जन एवं जीवनका बारेमा सकारात्मक भावना अभिवृद्धि गर्ने उद्देश्यले निःशुल्क रूपमा कार्यक्रम गरिएको हो ।
नेपाली राजदूतावास अबुधाबीको संयोजन र गैर आवसीय नेपाली संघ यूएईको आयोजनामा सिस्नुपानी नेपालका कलाकारहरूको प्रस्तुति रहेको थियो ।यूएईका लागि नेपाली राजदूत तेजबहादुर क्षेत्रीको प्रमुख आतिथ्यमा समुद्घाटन गरिएको उक्त कार्यक्रम आबुधाबीस्थित अलजोधा, एम ४४, मुसफ्फाबाट जनवरी १० तारिखमा सुरु गरिएको थियो ।
यसैगरी क्लिन्को क्याम्प , सज्जा सारजहाँर अलकुजको बलेदिया भलिबल ग्राउन्डमा जनवरी ११ तारिखमा गरिएको थियो । जनवरी १२ तारिखमा भने इभर सेन्डाई क्याम्प, सोनापुर र इन्डियन सोसल सेन्टर अजमानमा सम्पन्न भएको थियो ।
कार्यक्रममा सिस्नुपानी नेपालका तर्फबाट कार्यक्रम संयोजक तथा सिस्नुपानी नेपालका महासचिव टंक आचार्य, चर्चित हाँस्यव्यङ्ग्य कलाकार मनोज गजुरेल, गायक धीरेन्द्र पे्रमर्षि, कलाकार चक्र दवाडी र सरोज घिमिरेको उपस्थिति रहेको थियो ।
कलाकार मनोज गजुरेल र चक्र दवाडीले मदन भण्डारी र बीपी कोइरालाको भूमिका निर्वाह गरेका थिए । टंक आचार्यले आफ्नो र अध्यक्ष लक्ष्मण गाम्नागेको कविता सुनाएर परदेशिएका नेपालीलाई भावुक बनाए ।
राजदूतावासबाट प्रतिनिधित्व गर्दै दिपेन्द्र पौडेल र विकास भट्टराईले नेपालीले ध्यान दिनुपर्ने कुरामा चर्चा गरेका थिए । गैर आवसीय नेपाली संघ युएईका अध्यक्ष विकाश शाहीको अध्यक्षतामा सम्पन्न ती कार्यक्रमहरूमा गैर आवसीय नेपाली संघका निवर्तमान अध्यक्ष एवम् संरक्षक ठाकुरप्रसाद ढुङ्गाना, गैर आवसीय नेपाली संघ मध्यपूर्वका उपसंयोजक तथा गैरआवसीय नेपाली संघ युएईका पूर्व अध्यक्ष रमेश श्रेष्ठ लगायत धेरै सरोकारवाला संस्थाका प्रतिनिधिको पनि उपस्थिति थियो ।
नेपाली रेमिट्यान्समा उल्लेख्य भूमिका निर्वाह गर्ने श्रमशील नेपालीका दुःखसुखमा ऊर्जा थप्ने उद्देश्यले सिस्नुपानी नेपालले विगत एघार वर्षदेखि यो कार्यक्रम दुई थोपा हाँसो गर्दै आएको छ । युएईमा भने यो चौथो संस्करण हो ।
ग्लोबल रेमिटको मुख्य प्रायोजन रहेको उक्त कार्यक्रममा नेपाल वायुसेवालगायत अन्य दर्जनौँ संस्थाको प्रायोजन रहेको थियो ।
बार्सिलोना । स्पेनमा १७ वर्षदेखि बस्दै आएका शिवप्रसाद गौतमलाई अझै पनि भाषाले अड्चन पारिरहेको छ। सुरुवाती दिनमा भाषा राम्रोसँग नपढेकोमा अहिले उनलाई पछुतो लागेको छ। उनी १७ वर्षपछि फेरि स्पेनिश भाषा सिक्न कक्षा लिइरहेका छन् ।
‘भाषाको शक्ति: लेखकसँग विशेष संवाद’, कार्यक्रममा मंगलबार बार्सिलोनामा बोल्दै गौतमले भने, ‘भर्खर स्पेनमा आउनुभएका दाजुभाइ-बहिनीहरूलाई भाषा राम्रोसँग पढ्न म अनुरोध गर्दछु। युरोपेली देशहरूमा प्रायः आ-आफ्नै भाषा हुन्छन्। जुन देशमा बस्नुहुन्छ, त्यहाँको भाषा सिक्नमा जोड दिनुहोस्।’
उक्त कार्यक्रममा आफ्नो नयाँ पुस्तक ‘एल एस्पान्योल’ को बारेमा लेखक रामकृष्ण पुडासैनीले महत्वपूर्ण सन्देश दिएका थिए।पत्रकार बसन्त रानाभाटसँग एक घण्टाको संवाद गर्दै पुडासैनीले २० वर्ष लामो स्पेन बसाइका अनुभवलाई पुस्तकमा उतारेको बताए ।
उनले नेपालमा रहँदा नै विश्व भाषा क्याम्पसबाट स्पेनिश भाषा सिकेको स्मरण गर्दै भने, ‘नेपालमा हुँदा स्पेनिश भाषा पढ्दै र कति पय ठाउँमा पढाउने पनि मौका पाए।त्यस बापत मैले आकर्षक पारिश्रमिक पाएको थिएँ। त्यसले मेरो भाषा सिक्न थप चासो बढायो।’
स्पेनको सालामाङ्का विश्वविद्यालयबाट छात्रवृत्तिमा अध्ययन गरेका उनले भाषाको अभ्यासले मात्र दक्षता हासिल हुने बताए। ‘भाषा सिक्नका लागि सबैभन्दा ठूलो कुरा भनेको अभ्यास हो। लाज नमानी बोल्ने अभ्यास गर्नुपर्छ। अनुवादमा निर्भर रहनु भाषाको लागि घातक हुन सक्छ,’ पुडासैनीले थपे ।
कार्यक्रममा एनआरएनए स्पेनका अध्यक्ष पेशल कुमार कोइरालाले लेखकको भाषा प्रतिको चासोको प्रसंसा गर्दै भने, ‘पुडासैनीले स्पेनको नेपाली समुदायलाई उपहार स्वरूप प्रेरणादायी पुस्तक उपलब्ध गराउनुभएको छ।’ त्यस्तै, एनआरएनए आइसीसी सदस्य यज्ञ नारायण पौडेलले ‘एल एस्पान्योल’, पुस्तक भर्खर स्पेन आएका नेपालीहरूका लागि अत्यन्त उपयोगी हुने धारणा राखे।
स्पेन निवासी व्यवसायी तथा सामाजिक अभियन्ता दिनेशराज गिरीले भने, ‘भाषामा दक्खल भए रोजगार र व्यापारमा सहजता आउँछ। पुस्तक लेख्नु आफैँमा चुनौतीपूर्ण काम हो। लेखकलाई हामी सबैले हौसला दिनुपर्छ।’
कार्यक्रममा पुस्तकको लोकप्रियता उल्लेखनीय देखियो।दुई घण्टामै ५५ प्रति पुस्तक बिक्री भयो। साथै, नेपाली जनसम्पर्क समिति स्पेनले थप ५० प्रति पुस्तक खरिद गरी नयाँ नेपाली आप्रवासीहरूलाई निशुल्क वितरण गर्ने घोषणा गर्यो।
आजसम्म हामीले मानिसबीच विवाह भएको सुनिएको र देखिएको छ । तर, आज हामी एक महिलाले बिरालोसँग दुईपटक विवाह गरेको बारेमा जानकारी दिनेछौ । स्पेनमा बस्ने ४८ वर्षकी बारबेरेला बुचनरले आफ्नो विवाहको १० औं वर्षगाँठ मनाएकी छन् । उनले यो वर्षगांँठ मानिससँग नभएर दुई बिरालोसँग मनाएकी हुन् ।
वास्तवमा ती महिला पछिल्लो १४ वर्षदेखि आफ्ना बिरालाहरु स्पाइडर र लुगोसीसँग वैवाहिक सम्बन्धमा छिन् । २००४ मा बारबेरेलाले दूई बिरालोसँग विवाह गरेकी थिइन् । त्यो समयदेखि आजसम्म आनन्दले जीवन बिताएकी छिन् । बिरालालाई नै आफ्ना पति स्वीकार गरेर बसेकी छिन् ।
उनले जिन्दगीको लामो समय मानिसमा माया खोज्नमा बिताएकी थिइन् । पछि मानिससँग माया खोज्नु र गर्नु बेकार सम्झेर बिरालोसँग विवाह गरेको बताउँछिन् । उनको अनुसार बिरालोलाई जति माया गर्दा खुशी अरुबाट पाइदैन । उनले बिरालोहरुलाई एक पत्नीले गरेको जस्तै स्याहार गछिन । बिरालोसँग विवाह गर्दा नै उनले कुनै पुरुषसँग विवाह नगर्ने घोषणा गरेकी थिइन् ।
भारतको बिहार राज्यको औरंगाबादका एक जना किसानले एउटा यस्तो तरकारी खेती शुरु गरेका छन् जसको मूल्य अन्तरराष्टिय बजारमा एक लाख भारु प्रतिकिलो रहेको छ ।
यो तरकारको नाममा हो होप सुट्स । यो खानाले स्वास्थ्यका लागि एकदमै लाभदायक हुन्छ । जर्मनीमा यो खेतीको पहिलोपटक शुरुआत भएको भन्दै इन्डियन एक्सप्रेसले आफ्नो अनलाइन संस्करणमा समाचार छापेको छ ।
भारतका एक जना आईएस अफिसरले बिहीवार सवैभन्दा मंहगो र अनौठो उक्त तरकारीको तस्वीर सामाजिक सञ्जालमा ट्वीटरमा तस्वीर शेयर गरेपछि यसको यतिखेर सर्वत्र चर्चा परिचर्चा भइरहेको छ ।
उनले यसको साथै होप सुट्सको पहिलो पटक भारतमा खेती गर्ने प्रमाणपत्र तह उत्तिर्ण ३८ वर्षिय किसान अमरेश सिंहको तस्वीरसमेत शेयर गरेकि छन् । यतिखेर उक्त तस्वीर सामाजिक सञ्जालहरुमा भाइरल भइरहेको छ ।
आईएस अफिसर सुप्रिया साहुका अनुसार यो खेती भारतीय किसानको लागि गेम चेन्जर सावित हुन सक्छ । कृषक अमरेश सिंहले काशीस्थित भारतीय सब्जी रिसर्च इष्टिच्यूटको कृषि विज्ञको रेखदेखमा यो खेतीको शुरुवात गरेका हुन् । उनले शुरुवात रुपमा पाँच कट्ठा जग्गामा उक्त खेती गरेका छन् ।
होप सुट्सको प्रयोग गरेर बनाएको औषधीले क्षयरोगको उपचार हुने बताइएको छ । यसको अलावा यसको फूलबाट रक्सी पनि बनाउन सकिनेछ । त्यसैगरी यसको डाँठ तरकारीका लागि प्रयोग गर्न सकिन्छ ।
यसको खासगरी यूरोपियन मुलुकमा अत्याधिक माग रहेको छ । जर्मनी,ब्रिटेन, आयरल्याण्ड, स्कटल्याण्ड लगायतका मुलुकका नागरिकले यसको तरकारी प्रयोग गर्न अत्याधिक रुचाउने गरेको भारतीय सञ्चारमाध्यमहरुले उल्लेख गरेका छन् । यो तरकारीमा एण्टिबायोटिक अत्याधिक मात्रामा पाइने बताइएको छ ।
यसको सेवन गर्नाले दाँतको दुखाई कम हुने तथा क्षयरोगको विरामीका लागि पनि लाभदायक हुने बताइएको छ । यसको प्रयोग तरकारी खान, काँचै खान, सलादको रुपमा प्रयोग गर्न तथा अचार बनाउन पनि सकिने बताइएको छ । एजेन्सीहरु
